बढ्दो युवा पलायन र सैन्य प्रयोजनमा दुरुपयोग खतरा प्रति चिन्ता ब्यक्त

सुशील बस्नेत
२५ मंसिर,तुलसीपुर
सरकारको नीतिलाई ठिक ढंगले लागु गर्न नसक्दा युवाहरु रोजगारीका लागि बिदेशजाने क्रम पछिल्ला समयमा बढ्दो रहेको सरोकारवालाहरुले दाङको तुलसीपुरमा बताएका छन् । यसको मूल कारण देशभित्र रोजगारीको आधारभूत अधिकार उपलब्ध हुन नसक्नुको कारण रहेको उनीहरुले बताएका हुन ।
७६ औ अन्तराट्रिय मानव अधिकार दिवसका अवसरमा आज मंगलबार मानव अधिकार तथा शान्ति समाजद्वारा तुलसीपुरमा आयोजित नागरिक संवाद कार्यक्रममा राजनीतिक दल,जनप्रतिनिधि,नागरिक समाजका प्रमुख तथा प्रतिनिधिहरुले रोजगारीमा अवसर तिव्र नहुनु र विकासको अधिकार अपरिहार्य मानव अधिकारको रुपमा स्थापित हुन नसक्नुका कारण समस्या जटिल बन्दै गएको बताएका हुन । कार्यक्रममा बबई गाँउपालिकाका अध्यक्ष कुलबहादुर केसीले स्रोत र साधनको समुचित प्रयोग हुन नसक्नु, सुशासनको अभाव, सत्ता सञ्चालकहरुसँग समृद्धिका लागि आवश्यक सोच÷दृष्टिकोणको कमि लगायत अनेकौ कारणले नागरिकहरुमा असन्तुष्टि पैदा हुदै गएको बताउनुभयो ।
नेपाली काग्रेसका जिल्ला सहसचिव राजु आचार्य, नेकपा एमालेका नेता बिष्णु केसी, नेकपा माओबादीका नेता डिल्ली अधिकारी,राष्ट्रिय स्वतन्त्र पार्टिका नेतृ संगिता ढकाल, राष्ट्रिय जनमोर्चाका नेता एवम अधिबक्ता उत्तम भण्डारी र नेकपा(बिप्लप नेतृत्व) बिजय मल्लले राजनीतिक दलका केही नेताहरुका कारण पनि युवाहरु बिदेश पलायन हुने र आर्थिक लोभका कारण युद्धरत देशहरुमा सैन्यभर्ना हुने गरेको बताउनुभयो । त्यसका लागि ति नेताहरुमा सकारात्मक परिवर्तन हुनुपर्नेमा उहाँहरुले साझा दृष्टिकोण राख्नुभयो ।
सो अवसरमा मानव अधिकार तथा शान्ति समाजका केन्द्रिय सचिव निर्मल नेपाली, प्रेस स्वतन्त्र सेनानी टिकाराम रेग्मी, तुलसीपुर उद्योग बाण्ज्यि संघका उपाध्यक्ष बिश्व बस्नेत, महिला अधिकारकर्मी सुष्मा गिरी,पदमा चौधरी र प्रमिला तिवारी, राष्ट्रिय अपाङ महासंघका जिल्ला अध्यक्ष देवा डाँगी,राप्ती बहिरा संघका अध्यक्ष अजय शर्मा,अपाङ समाज सुधार केन्द्रका अध्यक्ष ईश्वरी खड्का लगायतले मानव अधिकारको बारेमा चर्चा गर्नुभएको थियो । कार्यक्रममा ईलाका प्रहरी कार्यालय तुलसीपुरका प्रमुख अनिल सिंह ठकुरीले तुलसीपुरलाई सुरक्षित शहर रहेको दावि गर्नुभयो । हल्लै हल्लाका कुरा नगर्न समेत उहाँले बताउनुभयो ।
कार्यक्रममा मानव अधिकार तथा शान्ति समाजका निर्वतमान केन्द्रिय बरिष्ठ उपसभापति सुशील बस्नेतले बढ्दो युवा पलायन र सैन्य प्रयोजनमा दुरुपयोगको खतरा बिषयक अवधारणा पत्र प्रस्तुत गर्नुभएको थियो ।
सो नागरिक संवाद कार्यक्रम शाखा सभापति कोमल डिसीको सभापतित्वमा भएको थियो । स्वागत मन्तब्य उपसभापति अमृतप्रसाद शर्मा र सहजिकरण सचिव माधव बस्नेतले गर्नुभएको थियो । शान्ति समाजले १० डिसेम्वरलाई अन्तराष्ट्रिय मानव अधिकार दिवसको अवसरमा प्रत्येक बर्ष बिबिध कार्यक्रम गरि मनाउदै आएको छ । दिवसका अवसरमा रोजगारीको अधिकारः मानव अधिकार,बढदो युवा पलायन,नेपालको जनसंख्या र युवा पलायनको तथ्यांक,सैन्य प्रयोजनमा प्रयोग हुने खतरा र नेपालको परराष्ट्र नीतिको आधार समेत समेटिएको अवधारण पत्र तयार गरेको छ ।