चैत १९
सुर्खेतमा बलात्कारपछि हत्या गरिएकी १६ वर्षकी किशोरीका आफन्तले २७ दिनपछि शव बुझेका छन् । जिल्ला प्रहरी कार्यालय सुर्खेतका प्रहरी नायब उपरीक्षक मोहन बुढा थापाकाअनुसार कर्णाली प्रदेश अस्पतालमा रहेको शव आज आफन्तले बुझेका हुन् ।
पक्राउ परेका चारै जनालाई पुर्पक्षका लागि बालसुधार गृहमा पठाउन जिल्ला अदालतले आदेश दिएपछि पीडित परिवार शव बुझ्न तयार भएका हुन् ।
फागुन २३ गते ट्युसन पढ्न घरबाट निस्केकी किशोरी वीरेन्द्रनगर नगरपालिका–१ मा रहेको जनजागरण सामुदायिक वनमा मृत फेला परेकी थिइन् । पोस्टमार्टम रिपोर्टअनुसार बलात्कारपछि भएको आन्तरिक चोटका कारण अत्यधिक रक्तस्राव भई ज्यान गएको देखिएको छ ।
प्रहरी प्रतिवेदनमा एक जनाले बलात्कार गरेको र अचेत भएपछि साथीहरूले ज्यान जोगाउने पहल नगरेको उल्लेख छ । सरकारी वकिल कार्यालयले भने सामूहिक बलात्कारको मागदाबीसहित अभियोगपत्र दर्ता गरेको छ । पक्राउ परेका किशोरीका प्रेमी भनिएकासहित चारै अभियुक्त १८ वर्षभन्दा कम उमेरका र एकै विद्यालयका विद्यार्थी हुन् ।