बिगतको भन्दा कोइलाबास नाकामा चहलपहल बढदै

श्रावण २१

भारतीय नाका कोइलाबास भन्सार कार्यालय दाङले लक्ष्यभन्दा झण्डै १० लाख बढी राजस्व संकलन गरेको छ । आर्थिक वर्ष २०८१÷८२ का लागि एक करोड ६३ लाख छ हजार राजस्व संकलनको लक्ष्य रहेकोमा एक करोड ७२ लाख राजस्व संकलन गरेको भन्सार प्रमुख लोकबहादुर विष्टले जानकारी दिनुभयो । संकलित राजस्वमध्ये मुद्दाबाट १५ लाख एक हजार असुल भएको र बाँकी अस्थायी पैठारीबाट संकलन भएको उहाँले बताउनुभयो । कार्यालयले अघिल्लो साउनमा १२ लाख राजस्व उठाउने लक्ष्य लिएकोमा नौ लाख २३ हजार मात्र उठेको थियो । भदौमा १३ लाख राजस्व संकलन गर्ने लक्ष्य लिएकोमा छ लाख १९ हजार, असोजमा १३ लाख २६ हजारमध्ये सात लाख आठ हजार, कात्तिकमा १२ लाख ८९ हजार लक्ष्य लिएकोमा नौ लाख १३ हजार तथा मंसिरमा १३ लाख ६८ हजार राजस्व संकलन गर्ने लक्ष्य लिएकोमा आठ लाख ९१ हजार संकलन भएको प्रमुख विष्टले जानकारी दिनुभयो ।
यसैगरी पुसमा १३ लाख २५ हजार राजस्व संकलन गर्ने लक्ष्य लिएकोमा ३० लाख ४६ हजार, माघमा १२ लाख ५४ हजार लक्ष्य लिएकोमा १२ लाख ४९ हजार, फागुनमा १४ लाख ४४ हजार राजस्व संकलन गर्ने लक्ष्य लिएकोमा ११ लाख, चैतमा १४ लाख ४३ हजार राजस्व संकलन गर्ने लक्ष्य लिएकोमा १० लाख ३२ हजार, यसै वर्ष वैशाखमा १३ लाख ८८ हजारमध्ये नौ लाख ८७ हजार, जेठमा १५ लाख ३३ हजारमा २३ लाख ४३ हजार तथा असारमा १४ लाख १७ हजार राजस्व संकलन गर्ने लक्ष्य लिएकोमा १९ लाख ६४ हजार संकलन भएको थियो ।भारतबाट कोइलाबास क्षेत्रसँगै रामजानकी मन्दिर, प्युठानको स्वर्गद्वारी मन्दिर, दाङको चौघेरा मन्दिरलगायतका ठाउँमा पूजापाठ तथा घुमफिरका लागि आउने नागरिकले प्रयोग गर्ने सवारीसाधनबाट बढी मात्रामा राजस्व संकलन हुने गरेको प्रमुख विष्टले बताउनुभयो ।
व्यावसायिकरूपमा यो नाका धेरै चलनचल्तीमा छैन । यहाँ सवारीसाधनबाट नै बढी कर उठ्ने गर्छ । कुनै समय व्यापार व्यवसाय धेरै हुने नाकाको पहिचान बनाएको कोइलाबास पछिल्लो समय भारतीय पर्यटक नेपाल भित्रिने नाकाको रूपमा चिनिएको छ ।